عزيزي المجلس العسكري ... اصحى

سيادة اللوا مشير طنطاوي - و أقصد بيها المجلس كله ...

فيه حكاية تبادرت لذهني كدة بعد بداية الثورة . امتى مش فاكر و هي كالتالي

واحد اشترى 3 تفاحات .. فتح الكيس و بص لأول واحد علشان ياكلها لقاها معفنة .. قام رايح راميها .. تاني واحدة بيطلعها من الكيس حصل برضه نفس الموقف الأول و لقاها معفنة .. راح راميها .. و علشان نفسه ما تنكسرش و يحس ان فلوسه ضاعت قام رايح قافل النور و طلع الثالثة علشان ياكلها.

و الراجل هنا هو الشعب المصري .. و التفاح هنا هو أنظمة الحكم.

أول نظام حكم مصري نيابي كان في أسرة محمد علي الملكي و قام عليه انقلاب 1952 بالنظام التاني.

تاني نظام هو نظام 1952 العسكري و قامت عليه ثورة 25 يناير.

ثالث نظام لسة مش عارفينه لكن معتبرينه انه انت يا سيادة اللوا مشير طنطاوي في الفترة الانتقالية و اللى انت كذا مرة تصرح انك بتدير البلاد ولا تحكمها يعني فترة لحد ما نسلمها لحكم مدني.

و اثناء الفترة بتاعتك دي عملت حاجات كتير في ظرف 100 يوم بعد تنحية مبارك تخلينا نوجه لك انذار .. أيوة انذار

و لأنه إنذار فأكيد له أسباب عدة تقدر تشوف جزء منها في الفيديوهات الموجودة تحت هنا واحد ورا التاني...

و الاحداث دي بسبب سوووووووووووووووء ادارتك للبلاد من أول يوم ... مشرف على اتحاد الاذاعة و التليفزيون .. يحيي الجمل .. عميد اعلام القاهرة و ما تم من ضرب الطلاب داخل الحرم الجامعي اللى معملهاش مبارك بأمن الدولة بتاعه ... و كتير من الحوادث المعروفة زي يوم 26 فبراير و 9 مارس و 9 أبريل و 13 مايو عند السفارة الاسرائيلية .. مروراً بموقفك المخزي يوم 2 و 3 فبراير يوم موقعة الجمل و تعذيب الشباب في المتحف و تهديد اللوا في التحرير للشباب بالقتل

و كلامك على انك رفضت تضرب نار على المتظاهرين رغم صدور أوامر و أحب أسألك عن الموضوع ده بالذات .. أيه اللى هايخلي الناس يوم 28 يناير رغم ان معركتهم كانت مع الشرطة تحرق لك مدرعات

و سيارات جيب عسكري

و تخطف دبابات

أكيد لأن حضرتك كنت بتساعد الشرطة ضددهم و إلا مفيش دخان من غير نار

و أحب أفكرك ان جيشنا .. جيش الشعب المصري .. قوامه من المجندين .. يعني كل واحد فينا بيدخل الجيش يقضي فترة التجنيد الاجباري و يخرج تاني بخبرة في استخدام الاسلحة .. يعني لو حضرتك كنت ضربت نار على المتظاهرين مكنتش هاتاخد في أيديهم غلوة لأنهم فيهم اللى بيعرف يستخدم السلاح الخفيف لحد الدبابة و المدفع . وكمان طبيعة مصر و مساحتها و مساحة العمران فيها تخلي من الصعب تكرار النموذج الليبي .. يعني أقل استخدام للسلاح ضد المتظاهرين يومها كان هايولع البلد و يخلي الجنود و صغار الضباط الغير مستفيدين من نظام مبارك زيكم ينقلبوا عليكم و يبقى مصيركم زي مصير أي خائن للبلد يفتح النار على شعبها و مبارك مثال.

و كنتم زمانكم أما مقتولين في حرب أهلية .. أو انقلاب عسكري ضدكم انتم كمان .. أو هربانين برة و مطلوب القبض عليكم.

لكنكم ببراعة و بعد نظر لم تتخذوا موقف كهذا بل فضلتم مسك العصا من المنتصف و سبتونا ننضرب يوم موقعة الجمل بقناااااااااااصة و انتم واقفين تتفرجوا و هوب براشوط على الثورة يوم 11 فبراير بحركة اللوا الفنجري التمثيلية البارعة.

و شربنا الموقف و قعدنا نكذب في الناس اللى بتقول انها اتعذبت في المتحف و في غيرها من المواقف المسكوت عنها.

فرجاء من شعب طيب خفيف الدم مزاجه عنب ديلوقتي .. بلاش نظام الفزاعات بتاع مبارك ده ... مرة الاقتصاد .. قلنا لكم لموا الضرايب المتأخرة على البهوات الكبار .. برضه ساكتين و بتضغطوا علينا.

الانفلات الأمني و انكشفتم يوم السفارة الاسرائيلية.

و بتلهونا بحمار وطني المفروض انه نتيجة ثورة قوامها الشباب جايبين ناس متوسط أعمارها فوق الستين سنة يحاوروا بعض.

كل شوية قوانين بدون حوار مع حد .. و مخالفة لمطالب الثورة.

يا ريت و رجاء أخير قبل يوم 27 مايو انكم تنزلوا تحاوروا الناس و الشباب اللي قام بالثورة و بلاش حكاية الاعلام الموجه دي لأننا في عصر الاعلام المفتوووووووووووح.

و كل ثورة و انتم طيبين.

صُدَف - الجزء الرابع

أها برضه ,, برضه هجوم تاني على المعتصمين في ماسبيرو و بنفس الاسلوب و بنفس الشخوص -- البلطجية -- هجوم بالليل و بالسنج و المطاوي و الخرطوش .. لا و أيه و الجيش موجود و الأمن المركزي كمان واقفين زنهار جنبهم

ماهو حاجة من اتنين .. يا أما تحموهم يا تسلحوهم بقى .. طيب نقول ايه يعني .. لما الشرطة واقفة و الجيش كمان و الناس تنضرب نفهم ايه احنا .. عاوزين تأدبوهم مثلاً .. مش عاجبكم طلباتهم .. أيوة صحيح فيه في طلباتهم حاجات أوفر شوية .. زي موضوع أمريكا ده و موضوع عضو مسيحي في مجلس رئاسي .. ماشي بس مش دي الطريقة برضه اللى نتفاهم بيها معاهم اننا نسيبهم كدة ملطشة لأي كلب معدي .. هم برضه مواطنين مصريين و لهم حق انهم يتوفر لهم حماية ما داموا مسالمين.

شوية عقل يا ناس .. و على رأي المثل .. اذا كان اللى بيتكلم مجنون .. اللى بيستمع عاقل

خليكوا انتم العاقلين و بلاش تخلوا شكلكوا وحش قدام الناس اللى برة علشان الاستثمارات .. ما هو برضه المستثمر لما يسمع ان الأمن عندنا مش مستتب هايخاف يجيب عندنا فلوسه .. مش كدة ولا أيه

صُدَف - الجزء الثالث

صباحنا نادي .. و صباحهم اسود ان شاء الله

نيجي بقى لحبايبنا .. الناس الكمل .. الناس الطيبين .. الناس اللى انا عارفهم كويس قوي بحكم عيشتي في وسطهم و مصاحبتهم و مخالفتهم و مناقشتهم و تعزيتهم و تهنئتهم .. الناس دي طيبين قوي و بيحبوا دينهم جداً و لهم صبر جميل على التعلم منه و نهل العلم الشرعي من مصادره الموثوقة .. جبايبي السلفيين.

الناس دي بجد يا جماعة مش بتاعة عنف خاااااااااالص .. بحق ربنا مش بتوع عنف و الكلام ده مش علشان هم اصحابي و أهلي و جيراني .. لأ و الله انما هم طبيعتهم كدة و بدليل انهم لو كانوا بتوع عنف كانوا على الأقل اشتكوا من التعذيب اللى اتعذبوه على يد أمن الدولة في مصر أيام مبارك .. بصراحة ما سمعناش منهم انهم اتعذبوا .. و اتعذبوا كتير كمان الا بعد ما المخلوع خلع على شرم الشيخ و أمن الدولة الناس اقتحمته .. ساعتها بس هم قالوا الحكاوي السودة اللى عندهم و طلعوا البلاوي اللى في نفسيتهم .. و سكوتهم ده سببه الخوف الرهييييب اللى كانوا عايشين فيه من الجهاز ده .. حتى انهم كانوا بيتعاونوا معاه خوف منه .. آه و الله خوف منه و لأنه لو واحد فيهم جرى له حاجة مالوش جماعة تدافع عنه .. انتم عارفين الاسلاميين كانوا مستباحين أيام المخلوع و كانوا ملطشة من كل الناس .. الداخلية و الخارجية و الاعلام و الاذاعة و التليفزيون و التاريخ و حتى الجغرافيا ... مكانش فيه الا الاخوان بس هم اللى لهم صوت و كان لما يموت لهم واحد.. كبيرهم بلاغ و كام واقفة هنا و هناك و كام مقالة و بيان و صلاة جنازة يقعدوا يدعوا فيها على الظلمة .. مكانوش حتى بيجيبوا سيرة مبارك.

الناس مشكلتها انها بس نظرها ضعييييييييف جداً ... ابعد حتة ممكن نظرهم يوصل لها هي بوز الجزمة – اكرمكم الله – اللى هم لابسينها .. حتى مش بيوصل لكم الجلابية اللى هم لابسينها.

أيوة نظرهم ضعيف .. والا مكانوش قوموا الدنيا على كاميليا شحاتة من سنة و لما مات سيد بلال محدش منهم فتح بقه و رفضوا انهم يعملوا مظاهرة علشان مفيش واحد علمانية تقف وسطهم – خوفاً من الفتنة – و كمان لما قامت الثورة قعدوا يحرموا فيها لحد ما نجحت و بعد كدة لقوا لها مرجعية شرعية كانت غايبة عنهم – أيه هي مش عارف.

نظرهم ضعيف لما سابوا المشاكل الكبيرة – المصلحة الأكبر – و قعدوا يدوروا على مشكلة فرد ممكن تجيب مشاكل أكبر – مفسدة أقل - .. سابوا مشكلة الاقتصاد و الأمن السايب و عجلة الانتاج – بتاعة الجيش – و المتربصين بمصر بلدنا و فكروا بس في المرأة المستضعفة الغلبانة المنكسرة اللى أسلمت – في نظرهم هم بس – و الكنيسة محتجزاها يا ولداه و محدش منهم فكر ايه عواقب الاهتمام الزايد بتاعه ده .. نظره مجابش أبعد من رباط الجزمة اللى هو لابسها خالص و هدد الشيخ الزعبي هنا انه هايخرج للأديرة ذاتها يحرر منها الاخت المخطوفة كاميليا شحاته .. و طبعاً علشان ملتحي و بيتكلم الفصحى و بيقول الآية و الحديث الناس الطيبين حبايبنا السلفيين مش هايقدروا يكسروا له كلمة و قاموا عملوا مظاهرة الكاتدرائية.

محدش منهم فكر خالص في عواقب فعلته .. كانوا أيام المخلوع اللي يكلمهم علشان يشتركوا في مظاهرة علشان فلسطين – أهو بقى المسجد الأقصى – يقولوا أصل المظاهرات لم ترد في السنة و بعدها بشوية أصل المفسدة بتاعة المظاهرة أكبر من المصلحة .. طيب فين فقه المفاسد و المصالح في موضوع كاميليا شحاتة .. و كانوا فين أيام سيد بلال و من قبله خالد سعيد و من قبله أكرم زهير و سليمان خاطر و أحمد ياسين و بغداد و أفغانستان.

طيب أهي كاميليا شحاتة طلعت يوم الجمعة و قفا كبييييييييييييير لكل اللى اتكلم عنها بدون دليل واحد يثبت كلامه.

لا و دي تيجي .. و لأن جهاز أمن الدولة عارفهم و مربيهم على أيده و عارف دماغهم كويس .. عارف انهم مش بتوع عنف .. انما أييييييييييييييه بتوع تسخين ولا أجدعها بوتوجاز فجر - و شوفوا هنا مثال واضح -.. تويتاية صغيرة في بروفايل واحد معين عارف هي هاتمشي ازاي و تروح للبال توك و سخن الناس و هم يسخنوا و يزودوا النار و ينزلوا .. و قاعد أخينا بتاع أمن الدولة مستني لحد ما البشوات راحوا الكنيسة و قام ضارب كرسي في الكلوب و لبسوها هم.

علشان برضه واحدة أسلمت برواية سندها .. هي ملهاش سند أصلاً .. و برضه ياخدوا قفا كبييييييييييييير و يلبسوا الليلة كلها.

و للحديث بقية ... و الله الموفق و المستعان.

صدف - الجزء الثاني

برضه صباحنا نادي و صباح الاندال مش باين – تميم البرغوثي بتصرف

قلنا في النوت اللى فاتت ان المستفيدين من برة هم أمريكا و اسرائيل و الأنظمة القمعية الاستبدادية في الوطن العربي زي القذافي و بشار و آل سعود و دول طبعاً مش ممكن يشغلوا عفاريت معاهم تأجر لهم بلطجية يحرقوا الكنايس و يضربوا الناس .. انما لازم يكون لهم هنا اعوان و مساعدين .. و طبعاً دول كمان لازم يكونوا مستفيدين من الفوضى على المستوى المحلي بقى بتاعنا أحنا.

و طبعاً من محاسن الصدف ان كاميليا تطلع لنا على القناة اللى اسمها الحياة من أمريكا و تقر انها لسة مسيحية و ان المشكلة خلاها تتمسك بمسيحيتها أكتر من الأول و الكلام الحلو ده تالت يوم الحكم اللى انطسه العادلي بتهمة غسيل الاموال و التربح و الحكم ده طبعاً خلى البهوات اللى معاه في طره بطنهم تكركب و يحاولوا يشوفوا لهم صرفة في الوضع اللى هم فيه ده و طبعاً حكاية الاعتصامات الفئوية طلعت فشنك و الأمن بدأ يرجع – مش قوي يعني - بوجود الناس و الشرفاء من الشرطة – و كلنا فاكرين شهيد الشرطة في القصيص.

فكان لازم يشوفوا كارت يرعبوا بيه الناس يخلوهم يترحموا على ايامهم و الأمن و الأمان اللى احنا كنا عايشين فيه أيام مبارك و الكارت جاهز .. الطاااااااااااااااااااااااااااااااااااااااااااااااااااائفية.

يعني ايه بقى الطائفية دي .. يعني حبايبنا السلف اللى كانوا نايمين من يوم ما ربنا خلقهم عن كل حاجة من أول الفساد السياسي و توريث الحكم و تزوير الانتخابات و العبارة و قطار الصعيد و التعذيب في أمن الدولة و قتل خالد سعيد و حتى الراجل اللى منهم سيد بلال برضه رفضوا انهم يعموا له وقفه و كانوا فاكرين بس كاميليا شحاتة – المرأة التى اشهرت اسلامها و اعتقلتها الكنيسة و قوموا الدنيا علشان كاااااااااااميليا شحاتة – برغم عدم ثبوت اشهارها لإسلامها و لما قامت الثورة حرموا المظاهرات لحد ربنا ما كرم و نجحت قامت نقحت عليهم الحكاية مجدداً و افتكروها و نسيوا الالاف اللى ماتوا من التعذيب في عهد مبارك على أساس انهم رجالة يستحملوا الاعتقال و التعذيب و القتل انما هي امرأة مستضعفة لا تتحمل الاعتقال الكنسي – اللى هو برضه مرفووووووووض – و برضه نسيوا انهم بكدة بيفشلوا الثورة لأنهم بيساعدوا النظام البائد و المستفيدين من وراه و المستفيدين من برة فشل الثورة بالحكاية دي.

و هو ده اللى حصل يوم ما كاميليا تظهر و تعلن انها مسيحية تقوم تطلع لنا واحدة تانية و هم طبعاً مش عاوزين يظهروا انهم كانوا غلطانيين يقوموا يروحوا بكل غباء لكنيسة في امبابة و يتظاهروا طلباً لخروج الأخت المحتجزة و طبعاً اللى بيلعب بيهم زي العرايس يستنى لما المظاهرات تسخن و يبعت العفاريت بتوعه يولعوا الدنيا.

و للحديث بقية ........ و الله الموفق و المستعان

صدف - الجزء الأول

صباحنا نادي و صباح الأندال مش باين - للعبقري تميم البرغوثي بتصرف.

أيوة صباحنا نادي ان شاء الله , أيوة كانت ليلة سودا ما يعلم بيها الا ربنا .. ناس تموت و ناس تنصاب بسبب اشااااااااااعة , بس يا ترى هي كانت الاشاعة هي السبب؟؟؟!!!؟

هي الاشاعة اللى خلت شوية بلطجية يروحوا امبابة بعد ما تكون المظاهرات سخنت و بدأ الضرب يولعوا في الكنيسة و يخلعوا و يسيبوا عم عادل صاحب القهوة يضرب نار على حسين ابن عم رمضان اللى ساكن فوقه!! اشاعة ايه الذرية دي .. ما كتير طلعت اشاعات زي كدة و مكانش لها التأثير القوي ده.

معلش بقى يا جماعة انتم لو بتدبحوا جاموسة - أكرمكم الله - كانت أخدت وقت على ما تفرفر و حتى بعد ما تتسلخ بنلاقيها بتحرك اطرافها لحد الشحنات الكهربائية تخرج منها .. فما بالكم بنظام بقى عامل زي السرطان جوة الجسد المصري خلانا طول ال 30 سنة اللي فاتوا نطلع أسوأ ما فينا و بقينا عاملين زي المدمن .. بس احنا أيه .. مدمنين كراهية في بعضنا من كتر ما جربناها 30 سنة و علشان تخرج لازم نعمل أحمد زكي في فيلم المدمن .. هايبان علينا الاعياء و الضعف و العصبية و التوتر و يمكن كمان نضرب دماغنا في الحيط زي ما حصل في امبابة كدة.

المهم بعيد عن قصة الادمان تعالوا نشوف الموضوع من زمان .. أيوة من كام شهر كدة خرج علينا عاموس يادين الرئيس السابق للمخابرات العسكرية الاسرائيلية (أمان) و قال فيها ان اجهزة المخابرات الاسرائيلية نشاطها في كل البلاد العربية و المسلمة سواءاً وقعت على كامب ديفيد او لأ . . و خص مصر و هاتلاقوا هنا ملخص لكلامه و خططهم في مصر اللى بدأت مع توقيع كامب ديفيد بتاعتنا و ازاي كان يهمهم تصعيد التوتر الطائفي في مصر .. و طبعاً بقى شغل 32 سنة مش لازم يروح هبدر .. و خاصة انهم أكتر ناس متضررين من سقوط مبارك.

أيوة هم الصهاينة أكتر ناس متضررين من سقوط مبارك ....

أولاً : كان أكبر داعم ليهم في المنطقة أمنياً , فكل الاجهزة الأمنية المصرية مسخرة لإضعاف المقاومة في فلسطين و خاصة في غزة, و كمان في لبنان و نفتكر أيام الانتفاضة لما المقاومة الفلسطينية قالت ابعدوا عننا المخابرات المصرية و الاردنية و احنا نتكفل بالاسرائيلية. و طبعاً ما ننساش هنا دور المعلم الكبير عمر سليمان الصديق الصدوق لهم و اللى ترك لهم الملعب لا و كان بيجيب فينا احنا اجوان لهم كمان.

ثانياً : و دعمهم سياسياً بأنه ساهم .. لأ هو اللى شق الصف العربي لوحده و اصبح عندنا دول ممانعة و دول اعتدال قصدي ....... و انتم فاهمين .. و ما ننساش طبعاً المصالحة الفلسطينية اللى الراجل بصراحة مخلاش عنده حاجة استخدمها علشان تفشل الا لما عملها.

ثالثاً : اقتصادياً ... الغاااااااااااااااااااااز و الكوييييييييييييييييييييز

كل ده طبعاً مش علشان سواد عيونهم انما علشان خاطر رضاهم السامي عن الخليفة جيمي الننوس و اللى الحمد لله الثورة خلعتهم و حطتهم في طره كمان.

و هم يعني الصهاينة دول بس اللى متضررين من نجاحنا .. لأو الامريكان لأن الانظمة القمعية عندنا كانت محافظة لهم على مصالحهم هنا .. بيرطعوا براحتهم بأساطيلهم و يضربوا في أي مكان هم عاوزينه و محدش بيقول لهم بم.

و كمان الانظمة القمعية اللى لسة موجودة زي السعودية اللى زعلانيين قوي على خلع مبارك لأنهم خايفين من نفس مصيره و قالها لوزير المالية سمير رضوان لما راح زارهم يعني كل دول يهمهم قوي اننا نفشل في بناء مصر ديمقراطية و بالتالي قوية اقتصادياً و لها مواقف سياسية جامدة و علشان كدة حاولوا يلعبوا بكذا كارت و فشلوا لكن لسة عندهم الكارت اللى ممكن يربح لو احنا سبنى الترابيزة لهم يلعبوا براحتهم .. لأ احنا لازم نقلب لهم الترابيزة .. و علشان احنا متعودين على الادمان .. كمان أدمنا الفزاعات .. يعني كانت فزاعة الاسلاميين الجهاديين و بعد كدة الاخوان و بعد كدة اليومين دول السلفيين .. معلش هو الادمان وحش انما هانتعالج ان شاء الله و نخف منه لما نبطل ناخد حقن من برة زي بتاعة امبابة كدة و كاميليا.

و المطلوب بقى أيه علشان نقلب لهم الترابيزة و نفض اللليلة الهباب دي .. أولاً النت بيسجل كل حاجة .. يعني أول واحد طلع الاشاعة دي لازم يطلع لكاليــــــــــــــــكه و يقر و يعترف مين اللي دسه علينا .. أيوة هو دي بقى اللى مندس فعلا لآنه جاي يخدم مصالح ناس برة . جوة مصر.

و كمان نشوف بقى على التليفزين المصري فيدو زي ده كدة بس يكون على الهواء مباشرة علشان نعالج الادمان بتاع الفزاعات و نطمن نفسنا اننا حلوين و كويسين . يعني الشيوخ اللى الناس بتشوفهم على الفضائيات يروحوا كنيسة امبابة و يدخلوها و يطلعوا بيان شجب و ادانة و تحريم للهجوم على دور العبادة أي كان نوعها.

و للحديث بقية ...................و الله الموفق و المستعان